Хоёр хүний аминд хүрч, 200 сая хүнийг аварсан гэрэл зураг

Судан улсад нүүрлэсэн их өлсгөлөнгийн үер К.Картерын авсан “Өлсч үхэж буй судан охин” нэртэй зураг сэтгүүлзүйн түүхэн дэх хамгийн шилдэг бүтээлд тооцогддог юм. Зурагчин энэ бүтээлээрээ 1994 онд Пулитцерийн шагналыг хүртсэн ч шүүмжлэлд ихээр өртсөн байдаг. Үнэхээр ч охиныг амь тавьж байх мөчид зурагчин ажилдаа улайран, охиныг дагах тас шувууг ойртож ирэхийг нь тэвчээртэй хүлээн хүлээн суусан гэдэг. Зургаа авсныхаа дараа тэрбээр охин дээр гүйн очсон боловч оройтсон байжээ. Хожим тэрбээр охины амийг авраагүйнхээ гэмийг амиараа төлсөн билээ. К.Картер охинд туслаагүйдээ гэмшин, 1994 оны долдугаар сарын 27-нд амиа хорлосон түүхтэй.

Сэтгүүлчид одоо хэр нь “Кен Картерын зөв үү, буруу юу” гэсэн асуултыг тавьж хоорондоо мэтгэлцээд авдаг юм. “Хүүхэд үхэж байгааг харсаар байж туслахгүй байна гэдэг байж болшгүй, гэмт хэрэг” гэж хариулах нэг хэсэг байхад “Хэвлэл мэдээллийн хэрэгслийн гол зорилго нь олон нийтэд нөлөөлөхөд оршдог. Тиймээс К.Картерын зөв” гэх хэсэг ч байх. Хүүхэд амиа алдаж байхад туслахгүй байх нь буруу ч энэхүү эмгэнэлт түүхтэй гэрэл зураг дэлхий нийтийн анхаарлыг Судан руу хандуулж, өлсгөлөнгөөр амиа алдах байсан олон хүнийг аварсан гэдэг нь гарцаагүй үнэн билээ. К.Картер үүнийг ойлгож байсан, дээр нь өвчин халдахаас сэрэмжлэн нутгийн иргэдэд гар хүрэхгүй байх НҮБ-ээс гаргасан анхааруулгыг мөрдсөн ч эхний хариултыг хэлэгчид түүнд дарамт үзүүлснээр амиа хорлоход хүргэсэн байдаг. Гэсэн ч ӨАБНУ-аас тодорсон шилдэг гэрэл зурагчдын нэг К.Картерын Суданд авсан зургууд дэлхийн гэрэл зургийн сан хөмрөгт томоохон байр суурь эзэлдэг билээ.    

Тэрбээр амиа хорлохынхоо өмнө “Би хямарч гүйцлээ… Утас алга…Намайг өлсгөлөн, шархтай хүүхдүүдийн цогцос, уур хилэн, өвчин зовлонгийн тухай тод дурсамж мөшгиж байна. Би явлаа. Аз байвал тэнд Кен Остербруктэй уулзах байх” гэсэн бичиг үлдээжээ.  

С.Төгөлдөр