П.Орхон: Олимпийн дараах Азийн аваргын тэмцээн надад чухал байсан

 Чөлөөт бөхийн Олон улсын хэмжээний мастер П.Орхонтой ярилцлаа.

-      “Mongolia open 2017” тэмцээнээс алтан медаль хүртлээ баяр хүргэе?

-      Баярлалаа.

-      Тэмцээний гол өрсөлдөгч хэн байв?

-      Гол өрсөлдөгч мэдээж Баагий эгч (Гавьяат тамирчин С.Батцэцэг) байлаа. Гаднаас, ОХУ-аас олон өрсөлдөгч тамирчин ирэх байх гэж бодож байсан. Гэвч ОХУ-аас нэг тамирчин ирсэн ч нөгөө зоонд ороод зоондоо хожигдсон.

-      Азийн аварга шалгаруулах тэмцээнд оролцох ёстой байсан. Яагаад оролцохгүй болсон юм бэ?

-      Гол шалтгаан нь шигшээ багийн бэлтгэлд хамрагдаагүй гэсэн үүднээс хассан. Бид нарт энэ талаар багш нар хэлээгүй. (Улсын аварга болсон ч энэ удаагийн Азийн аваргыг Гавьяат тамирчин Г.Мандахнаран, Э.Ням-Очир, С.Батболд, П.Орхон, О.Үйтүмэн, Н.Лхамгармаа нар өнжиж байгаа) Өөрсдөө хөөцөлдөж, шигшээ багийн албатай уулзаж олж мэдсэн. Миний хувьд Азийн аварга маш чухал тэмцээн байсан. Анх жин өгсөж байгаа. Гаднын өрсөлдөгч олон тамирчидтай барилдаж үзээгүй. Гол нь Азийн хэмжээнд өөрийгөө сорьж үзэх, туршлага судлах тэмцээн байлаа. Шинэ Олимпийн дараах Азийн аваргын тэмцээн надад чухал байсан. Оролцож чадахгүй болсон нь харамсалтай л байна.

-      Улсын аваргад энэ жил чи түрүүлсэн. Тэгэхээр Азийн аваргад орох эрхтэй биз дээ?

-      Тийм. Холбооны гаргасан дүрмээр бол улсын аваргад түрүүлсэн тамирчин Азийн аваргад оролцох эрхээр хангагддаг. Тэгээд Азийн аваргад оролцохоор бид бэлтгэлдээ орсон байсан. Клуб дээрээ. Азийн аваргаас сарын өмнө бид шигшээ багийн цугларалтадаа гарч эхэлсэн. Тэр үед Азийн аваргад орох тамирчдын нэрийг батлаад явуулсан байсан.

-      Шигшээ багийнхаа бэлтгэлд яагаад хамрагдаагүй юм бэ?

-      Би өөрийнхөө ажиллаж сурсан үндсэн багш дээрээ л бэлтгэл хийе гэсэн зорилготой байсан. Тэгээд манайхан тусгай төлөвлөгөөгөөр бэлтгэлээ хийгээд эхэлсэн байсан юм. Би Олимпийн наадмаас ирснээсээ хойш л бэлтгэлээ хийгээд эхэлсэн. Улсын аварга, ОХУ-ын И.Ярыгиний нэрэмжит тэмцээнд түрүүлсэн. Азийн аваргад түрүүлж чадна гэсэн итгэлтэй бэлтгэлээ хийгээд явж байсан. Тэгсэн чинь намайг хассан байна лээ. Шигшээ багийн таван багшийн шийдвэр гэж тайлбарласан.

Би улсын шигшээ баг дээр бэлтгэл хийхгүй байгаа. Тиймээс Батбаяр багшийн хэлснээр “Чамайг ямар бэлтгэл хийж, ямар формтойг мэдэхгүй, хэрхэн амжилт үзүүлэхийг нь мэдэхгүй байж толгой мэдэн улсын мөнгөөр авч явах эрх багш нарт байхгүй” гэж тайлбарласан. Нэгэнт ийм шийдвэр гарсан учраас хүндэтгэж байна. Азийн аваргад оролцох баг тамирчиддаа чин сэтгэлээсээ амжилт хүсч байна. С.Батцэцэг эгчдээ тэмцээнд нь амжилт хүсье.  

-      Ц.Цогтбаяр, Ц.Хосбаяр багш хоёр бол чиний үндсэн багш. Одоо улсын шигшээд байхгүй. Өөрийнхөө үндсэн багш дээрээ бэлтгэл хийх нь чамд давуу тал байдаг байх л даа?

-      Би яагаад өөрийнхөө клуб рүү очиж бэлтгэлээ хийдэг гэхээр, барилдааны алдаа илүүтэй засагдах, бэлтгэлдээ илүү орж чадаад илүү барилддаг. Би 2015 онд яг ингээд Дэлхийн аваргад орж чадахгүй болоод үлдэж байсан. Түүний дараагаар 2015 онд клуб дээрээ бэлтгэлээ хийсэн. Тэгээд ОХУ-д болсон И.Ярыгиний нэрэмжит тэмцээнд  Японы алдарт бөх Каори Ичог хожиж байсан. Гэхдээ Дэлхийн аваргын бэлтгэл, цугларалтан дээр шигшээ багтайгаа гарна гэсэн бодолтой байна.

 -      Чиний бэлтгэл сургуулилт, тэмцээн уралдаанд дэмжлэг үзүүлдэг хүмүүс хэр байдаг вэ?

-      Аваргууд академи байгуулагдсан. Аваргууд академид бол спонсор бий. “Тайгам Алтай” группийн захирал Бүргэдэй ах байна. “Батзол” группын захирал Батсайхан ах байна. Манай 53 кг-ийн жинд сая түрүүлсэн Отгонжаргал бид хоёрыг ивээн тэтгэдэг. Энэ дашрамд үргэлж ард минь байдаг гэр бүл, найз нөхөд, Батлан хамгаалах яам, Алдар спорт хорооны удирдлага, багш хамт олон, Аваргууд академийн спонсор багш нар, Үндэсний шигшээ багийн алба, Анагаах ухааны алба болон Чөлөөт бөхийн холбооныхондоо талархаж явдагаа илэрхийлье.

-      Одоо чамайг ямар тэмцээн хүлээж байна?

-      Сарын дараа дэлхийн аваргын сорилт тэмцээн болно. Манай холбооны гаргасан шинэ дүрмээр улсын аваргын хоёр, гурав, дөрөв, тавдугаар байранд орсон тамирчид тойргоор барилдаад хэн ялсантай нь Улсын аварга болсон тамирчинтай халз барилдана. Тэгээд хоёр удаа түрүүлж хожсон нь дэлхийн аваргад явах эрхтэй болдог дүрэмтэй. Тэгэхээр тамирчид хараахан дэлхийн аваргад явах эрхээ аваагүй байна гэсэн үг.

-      Риогийн Олимпод  Г.Мандахнаран хүрэл медалийн болзол хангаад алдсан. Үнэхээр харамсалтай зүйл болсон. Дасгалжуулагч багш Б.Баяраа, Ц.Цогтбаяр нар маш хүчтэй эсэргүүцлээ илэрхийлсэн. Чи тухайн үед тэнд байсан хүний хувьд тэр үйл явдалыг юу гэж хардаг вэ?

-      Би тэр үед зааланд Мандахаа ахын барилдааныг хараад л байж байсан. Өмнөх өдөр нь охидуудын барилдаан дуусчихсан. Маргааш нь охидын багаас зааланд очиж дэмжсэн хүн нь Ука эгч (О.Насанбурмаа) бид хоёр байсан. Мөн эрэгтэйчүүдийн баг тамирчид бүгд байсан. Бид хүрэл медалийн болзол хүртлээ гээд баярлаад, уйлалдаад бие халаалтын зааланд байж байсан. Гэтэл торгуулийн оноо тавиад ялагдах болоод манайхны сэтгэл санаа хэцүү болсон. Манай Хосоо багш, Баяраа багш хоёр хүүхдүүдийнхээ төлөө хэр их сэтгэл гаргаж ажилладаг, тэр чинээгээрээ эсэргүүцлээ илэрхийлсэн. Зөвхөн өөрсдийнхөө төлөө байсан бол хэзээ ч тэгж эсэргүүцэхгүй гэдэгт итгэлтэй байна.  Тийм болохоор тэр их хүч хөдөлмөрийг шүүгч нар үгүй хийж байгаад мэдээж их харамссан. Хүний гаргасан хүч хөдөлмөрийг  луйвардахаар тэр хэмжээгээр эсэргүүцсэн байх. Хоёр багш маань өөрийнхөө хүүхэд шиг сэтгэл зүрх гаргаж бэлтгэл сургуулилтад нь анхаарч ирсэн. Тийм учраас хүнд байсан нь ойлгомжтой.

Ярилцсанд баярлалаа.

Т.Амараа