НҮБ: Малын хорогдол 4, 5 дугаар сард нэмэгдэж, 1.2 саяд хүрч магадгүй

 Монгол Улсын нийт нутгийн 20 хувьд нь цасан бүрхүүл тогтсон хэвээр байгаа бөгөөд цаг агаар цаашид хүйтрэх төлөвтэй байгаа аж. Ийнхүү өвөлжилт болон хаваржилт хүндэрснээс болж хорогдсон малын тоо нэгдүгээр сард 40 мянга байсан бол дөрөвдүгээр сарын 7-ны байдлаар 858 мянгад хүрээд байна. Мөн энэ нь Монголын нийт малчдын 41 хувьд нь шууд нөлөө үзүүлж, 11 мянга 800 айл өрхийн малын тоо 100-аас бага болжээ.

Тарга тэвээр сайн авч чадаагүй малын хорогдол 4, 5 дугаар сард нэмэгдэж, 1.2 саяд хүрч магадгүй гэж НҮБ-аас анхаарууллаа.

Харин зудад нэрвэгдсэн малчдад олон улсын байгууллагууд 6.36 сая ам.долларын тусламж үзүүлээд байгаа аж. Энэ нь нийт шаардлагатай байгаа 14.27 сая ам.долларын тусламжийн 44.5 хувьтай тэнцэж байгаа талаар НҮБ-аас мэдээллээ. Одоогоор олгож эхлээд байгаа тусламжийн 38 хувийг Онцгой байдлын үед зарцуулах НҮБ-ын Нэгдсэн сан, 31 хувийг Азийн Хөгжлийн банк, 13 хувийг Улаан загалмайн нийгэмлэг, 5 хувийг Европын комисс тус тус гаргасан байна.