Монголын дөрвөн иргэн хилийн чанадад гэмт хэргийн хохирогч болжээ

Манай монголчууд ажиллаж, амьдарч ахиу цалин мөнгө олох хүсэл сонирхолтойгоор хилийн чанадыг зорин хар бор ажил хийж, хүний газар хөлсөө урсгаж, махаа уран байж хэдэн төгрөг цуглуулан хадгалж, эх орон ээж аав, эхнэр нөхөр, элгэн садандаа эргэн ирдэг. Гэхдээ зарим нь эргэн ирж чадалгүй хүний нутагт амиа алдах тохиолдол гарсаар байгаа юм. Түүнчлэн харьд гэмт хэргийн золиос буюу хохирогч болох асуудал гарсаар байгааг албаныхан хэлж байна. 

Тухайлбал, 2015 оны аравдугаар сарын байдлаар хилийн чанадад Монголын 76 иргэн нас баржээ. Тэдний 35 нь өвчний улмаас, 17 нь ослоор, 11 нь золгүй байдлаар, ес нь амиа хорлож, дөрвөн нь гэмт хэргийн хохирогч болж амь насаа алдсан байна. Одоогоор тэдэнд Гадаад хэргийн яамны сангаас 108 сая төгрөгийн тусламжийг үзүүлээд буй аж.