Д.Нямхүү: ХӨСҮТ-д тэрбум 200 сая төгрөгийн эм тариа дутагдаж байна

- Улаан бурхан өвчний дэгдэлтийн үед иргэд ганц ХӨСҮТ-д хандаж ирдэг. Тэгэхээр яг өнөөдрийн байдлаар байдал ямар вэ?

- Улаан бурхан өвчин дэгдээд хоёр сар боллоо. Дөрвөн том давалгаа явж байна. Тодруулбал, нэг ихсээд, жоохон багасаад дахиж ихсээд буцаад буурч байх жишээтэй. Өвдсөн хүүхдүүдийн ихэнхи нь улаан бурханы вакцин хийх насанд хүрээгүй байгаа. Вакциныг 9 сартайд, хоёр дахь тунг хоёр настайд хийдэг. Гэтэл өвдсөн хүүхдүүдийн ихэнхи нь вакцины насанд хүрээгүй 5-6 сартай байна. Бид энэ нөхцөлд вакцины насыг 9 сар хүргэлгүйгээр угтуулж 5 хүртэлх насны 3700 хүүхдийг вакцинжуулах төлөвлөөд байна.

Улсын хэмжээнд  5-р сарын 15-25-ны хооронд нэгдсэн байдлаар Улаан Бурханы вакцинжуулалт хийнэ. Өнгөрсөн хугацаанд энэ өвчнөөр өвдөөд, эмчлэгдээд эдгэсэн хүүхдүүд дархлаатай болсон байгаа. Биндий тооцоогоор зургаадугаар сарын сүүлчээр гэхэд энэ том дэгдэлтийг дарж авна.

- Хэвтэж эмчлүүлэх ор, болоод эм бэлдмэлийн хүрэлцээ ямар байгаа вэ?

- Маш их ачаалалтай байна. Манай эмнэлэг 530 ортой гэтэл 730 гараад бараг 200 ор нэмж дэлгээд ажиллаж байна. Ихэхни өвчтнүүд маань улаан бурхан гэсэн оноштой ирж байна.

- Өвчний дэгдэлт ийм өндөр байгаа нөхцөлд салбарын яамны зүгээс ямар бодлого барьж ажиллаж байна вэ?

- Эрүүл мэндийн яам, Засгийн газар 500 сая төгрөг баталж өгсөн. Үүний 200 сая төгрөгийг ХӨСҮТ эм, оношлуур мөн эмнэлгийн бүтээгдэхүүн авч байна. Гэхдээ энэ нь дан ганц  ХӨСҮТ-д хэрэглэгдэхгүй. Аймаг сум хөдөө орон нутгуудаар тараагдана.

- Эмийн төсөв танагдсан нь та бүхний ажилд хүндрэл учруулж байна уу? 

- Эмийн төсөв улсын хэмжээнд 24 хувиар танагдсан явдал бидэн их хүнд туссан. Тэр 24 хувь дотор манай эмийн хэрэглээ 1 тэрбум 200 сая төгрөгөөр танагдсан байгаа. Энэ бол маш их ачаа. Гэтэл энэ дэгдэлтийн хүнд үед бид сард хэрэглэх эм, тариагаа долоо хоногт, улиралд хэрэглэхийгээ нэг сардаа л дуусч байна.

- Хэрэв нэмэлт байдлаар эм, тариаг шийдэхгүй бол эмчилгээ доголдоно гэж ойлгож болох уу?

- Тэгэхээр төсвийн тодотголоор энэ эм тариагаа нөхөж авахгүй бол энэ жил эм тариа хүрэлцээ маш хүнд байх болно. Үүнийг салбарын яам, Засгийн газар маш сайн ойлгож дэмжиж байгаа. Энэ богино хугацаанд зарцуулагдсан 1 тэрбум 200 сая төгрөгийн эм тариаг ХӨСҮТ-д нөхөж олгож өгөх байх л гэж хүлээж байна даа. Хэрэв ингээд эм тариа ирчих юм бол энэ жилийн үйл ажиллагаа ямар нэг хүндрэл доголдолгүй хэвэндээ явуулна.

- Хэдэн сар хүртэл одоогийн нөөц эм тариагаараа ажиллаж чадах вэ?

-Долоон сараас өмнө энэ эмний мөнгө төсвийн тодотголоор ороод ирнэ гэж найдаж байна.