Жүжигчин Н.Ариунболд: Хоёр жүжигчин маань бидэн дээрээ хүрээд ирвэл цаашаа гэхгүй

"Шинэ үе" продакшны захирал жүжигчин Н.Ариунболд нэгэн хэвлэлд өгсөн ярилцлагадаа морь жил надад их хатуу байлаа хэмээн өгүүлжээ. Учир нь тэдний продакшнтай холбоотой дараалласан хоёр харамсалтай зүйл болж нөхөж болшгүй гарз хохирол учирсан. Мөн түүний оюутан ахуй цагаасаа салалгүй нөхөрлөсөн уран бүтээлийн анд болох жүжигчин Амбий бурхны оронд одсон. Энэ бүгдэд маш их харамссанаа жүжигчин Н.Ариунболд илэрхийлжээ. Тэрбээр хэлэхдээ "Хүмүүний амьдралынэ зовлон гунигийг тойрч өнгөрч болдоггүй. Хатуу бэрхийг сэтгэлийн хатаар даагаад л гарах чадвар хүнд байх учиртай. Миний бие энэ хугацаанд ингэж л бодож өөрийгөө зоригжуулж байлаа" хэмээн өгүүлсэн байна.

Мөн тэрбээр жүжигчин Д.Оюунтуул, Ц.Алдармаа нарын талаар хэлэхдээ "Нэг нь эмчилгээндээ яваад, нөгөөдөх нь хариуцлагаа хүлээгээд байж байгаа. Хоорондоо сайн ойлголцсон. Амьдралын зам гэдэг урт шүү дээ. Залуу хүнд алдах онох зүйл бишгүй л тохиолдоно. Тэр хоёрыг олон сайхан ирээдүй, он жилүүд хүлээж байгаа. Бүхнийг дахиад шинээр эхлээд зүтгэхэд залуу хүмүүст цаг хугацаа байна. Цаашид урлагтаа зүтгэх үү, өөр салбарт хүч сорих уу гэдэг нь тэдний өөрсдийн асуудал. Хэрвээ урлагт хайртай гээд бидэн дээрээ хүрээд ирвэл цаашаа гэхгүй. Шинэ бүтээлдээ дүр хувиарлаад урьдынхаараа ажилдаа орно хэмээжээ.