Л.Болд хүүхдийн паркийг буцааж өгнө гэв

МЗХ-ноос өнгөрсөн оны дөрөвдүгээр сараас санаачлан эхлүүлсэн “Паркаа аваръя” хөдөлгөөн цахим ертөнцийн хүрээнд маш идэвхтэй өрнөж, энэ хөдөлгөөнд олон хүүхэд залуучууд, иргэд нэгдэж буйгаа өөрсдийн фэйсбүүк хуудсаар дамжуулан илэрхийлсээр байсан билээ. Түүнчлэн паркийн газраас хувь эзэмшдэг компаниудыг хэвлэл мэдээллийн хэрэгслээр олон нийтэд ил болгож, нээлттэй хэлэлцүүлгийг зохион байгуулж, тодорхой асуултуудад хариулт авч чадсан. Одоо хүртэл идэвхтэй явагдаж байгаа “Паркаа аваръя” хөдөлгөөнийхөн ямартай ч Л.Болдыг “Улаанбаатар хотын мэдэлд парк очих ёстой. Хүүхдүүдэд нь өгөх хэрэгтэй” гэж хэлүүлж чадлаа. Гадаад харилцааны сайд Л.Болд саяхан өгсөн нэгэн ярилцлагадаа “Энэ бүхэн бол хүүхдүүдийн л өмч. Би үүнийг улс, хот мэдэлдээ аваасай гэж бодож байна. Парк бол   хүүхдийн байгууллага. Өнөөдөр хотын удирдлагууд үүнийг цааш нь авч явах хэрэгтэй” гэдгийг онцолжээ. Дашрамд дурдахад, “Бодь” группийнхэн газраа өгчихвөл би маргааш нь газраа өгнө гэдгийг “Мон Уран” компанийн захирал, УИХ-ын гишүүн Б.Наранхүү нээлттэй хэлэлцүүлгийн үеэр хэлж байсан гэдгийг эргэн сануулъя.

С.Цахиур