Ирэх жилийн Науризын баяраар Н.Энхбаяртай хамт зочилж ирнэ гэв

Гуравдугаар сарын 22-нд өдөр шөнө тэнцдэг. Өөрөөр хэлбэл, маргаашнаас эхлээд өдөр уртсаж, шөнө богиносох учиртай. Жил бүрийн яг энэ өдөр Казакын ард түмэн НАУРИЗ буюу нарны баяраа тэмдэглэдэг уламжлалтай. Хэдийгээр Казак түмнийг уламжлал, ёс жаягаа нарийн чанд хадгалж ирсэн гэдэг ч сүүлийн 20 гаруй жилийн хугацаанд амьдрал хөөн энд тэнд аж төрөх болжээ. Тэдний нэгээхэн хэсэг нь Улаанбаатар хотын Налайх дүүрэгт амьдарч буй Казакууд.

Өнөөдөр Шадар сайд, МАХН-ын дэд дарга Д.Тэрбишдагва болон МАХН-ын нарийн бичгийн дарга Ч.Чимэдсүрэн нар НАУРИЗ-ын баярыг тохиолдуулан Налайх дүүрэгт амьдарч буй Казак түмний төлөөлөлд баяр хүргэн хүндэтгэл үзүүллээ. Налайх дүүрэгт нийтдээ 6000 гаруй казакууд амьдардаг байна. Тэдний төлөөлөл болгон таван айлаар орж хүндэтгэл үзүүлэв. Эхний орсон айл бол Чохойнх байв. Эднийх мал, туслах аж ахуй эрхлэн амьдардаг бөгөөд Чохойн ээж Адилхан 80 гаруй насыг зооглосон хэдий ч Науризын баяраар том хүүгийндээ Баян-Өлгий аймгаас ирээд байсан юм. Баярын энэ өдөр Шадар сайд, МАХН-ын дэд дарга Д.Тэрбишдагва хэлэхдээ, “Өмнө нь МАХН-ын дарга Н.Энхбаяр НАУРИЗ-ын баяраар казак түмэндээ тогтмол хүндэтгэл үзүүлж ирсэн. Энэ жилийн тухайд өөрийн биеэр ирэх боломжгүй байгааг та бүхэн маань мэдэж байгаа байх. Тиймээс энэ удаа бид бүхнийг заавал та бүхэнд очиж хүндэтгэл үзүүлээрэй гэж захисан юм. Энэ дагуу та бүхнийхээ баяр дээр баяр нэмж, Н.Энхбаяр даргын мэндчилгээг монгол түмний ёсоор мэндийн цэнхэр хадагийн хамт өргөн барьж барьж байна. Та бүхний амьдрал аз жаргалаар дүүрэн байх болтугай” гээд Н.Энхбаярын таван боть номын хамт гардууллаа. Ная гаруй насыг зооглоод буй Адилхан гуай,“Н.Энхбаяр дарга Монгол Улсын төлөө хоёргүй сэтгэлээр зүтгэж, их зүйлийг бүтээсэн хүн. Түүний үйл хэрэг, ач гавьяаг бид бүхэн мартах ёсгүй” гэдгийг тодотгоод хурдан хилс хэргийг нь цагаатгах тал дээр та бүхэн сайн ажиллаарай гэж захив.

Шадар сайд Д.Тэрбишдага Чохой гуайнд хүндэтгэл үзүүлсэний дараа өдгөө 91 насыг зооглоод буй ахмад дайчин Т.Мөтөл гуайнд зочиллоо. Казак түмний уламжлалын дагуу домбор хөгжим эгшиглэж, Т.Мөтөл гуайн гэрт инээд хөөр, баяр цэнгэл бялхсан гэхэд болно. Т.Мөтөл гуай, Шадар сайд, МАХН-ын нарийн бичгийн дарга Ч.Чимидсүрэн болон дагалдан яваа хүмүүст хандан, “Эх орныхоо бүрэн бүтэн байдлыг хамгаалахын төлөө залуу насаа зориулж, хоёр ч дайнтай нүүр тулж явлаа. Ер нь хүн хамт олны дунд хүн болж, тэднээс амьдрах ухааныг олж авдаг юм. Тиймээс залуу хойч үеийнхэн маань амь нэгтэй байж, улс орныхоо ирээдүйн хөгжлийн төлөө сэтгэл нэгтэй зүтгээрэй” гэдгийг захилаа. Тэрээр хэдий нас өндөр болсон ч ахиад 25 наслах хүсэлтэй гэдгээ илэрхийлэв. Үүний хариуд Шадар сайд, “100 насалж, зургаадаа таяг тулаарай” хэмээн ерөөсөн юм.

Өмнөх жилүүдийн НАУРИЗ-ын баяраар МАХН-ын дарга Н.Энхбаяр өөрийн биеэр казак түмэн дээрээ зочилж баярыг нь хуваалцдаг байжээ.  Тиймээс орсон айл болгонд Н.Энхбаярын биеийн байдал ямар байгаа, хэзээ цагаатгах гэж байгаа талаар асууж сурж байв. Үүний хариу болгон ирэх НАУРИЗ-ын баяраар хамтдаа зочилж ирэхээ Шадар сайд хэлэв.