“Гавьяагүй” гавьяатуудаас ичээд тэмдгээ зүүдэггүй найруулагч

“Мартагдашгүй намар”, “Амьдралын нахиа”, “Эргэж бодох бодол” зэрэг олон сайхан киногоороо үзэгчдийн танил болсон УГЗ, кино найруулагч Х.Дамдин гуай өдгөө РТДС-д багшилж буй. Сэтгэлд тодхон санагдах сонирхолтой үйл явдал бүхий эрхэм найруулагчийн бүтээлээс баяр жаргал, гуниг харуусал, хайр энэрэл зэрэг хүний амьдралын олон өнгө харагддаг учраас өнөө хэр нь хүмүүсийн үзэх дуртай кинонууд хэвээр үлдсэн болов уу. Москвагийн киноны дээд сургуулийн зураглаачийн ангийг 1962 онд төгссөн тэрбээр “Энэ хүүхнүүд үү” киногоор дипломынхоо ажлыг хийж байжээ. Харин найруулагчийн гараагаа 1971 онд “Улаан дарцаг” киногоор эхэлсэн бөгөөд хүүхдийн зохиолч н.Содномдорж гуайн “Навсай Дамба ба түүний нөхөд” найраглалаас сэдэвлэж хийсэн гэдэг.

Хийж бүтээсэн зүйлээрээ хэний ч өмнө бахархдаг Х.Дамдин гуай гавьяа шагналын тухайд хатуухан бодолтой явдаг гэх. “Би уг нь энэ тэмдгийг чинь их л зовж байж авсан юмдаг. Гэтэл одоо юу ч хийгээгүй жаахан хүүхдүүд хүртэл авчихсан харагдах юм. Хэдийгээр ижилхэн цол тэмдэг авсан ч, хийж бүтээснээрээ газар тэнгэр шиг зөрүүтэй улс шүү дээ, бид. “Гавьяагүй” гавьяатуудаас ичээд энгэрийн зүүлт шиг болтлоо үнэгүйдсэн энэ тэмдгийг зүүж чадахгүй нь” гэж хэлсэн түүнийг үгийг ахмад уран бүтээлчид их дэмжсэн гэдэг. Мөнгөний төлөө уран бүтээл хийж, өөрсдийгөө ч танихааргүй болтол бусдыг дуурайж байгаа охид залуусыг хараад сэтгэл нь эмзэглэдэг энэ эрхэм эх оронч үзлийг дээдэлдэг гэсэн шүү.

Р.Есүй