“Sync” хамтлагийн Энхүүш аав болох уу

“MN-25 дугаар суваг” телевизээс зохион байгуулсан “Чи шүү” реалити шоунаас төрсөн тус хамтлагийг мэдэхгүй хүн ховор биз. “Реалити шоунд оролцоогүй бол хэзээ ч бие биеэ олж, хамтлаг байгуулах хүсэл төрөхгүй байсан биз” хэмээн ярьдаг дуучин залуус рок попын ертөнцөд хэдийнэ танигдсан. Шоуны ялагч Дөлөө хэсэг хугацаанд ганцаараа дуулах гэж оролдоод бүтэлгүйтсэн тул хамтлагтаа эргэж ирсэн. Эргээд дөрвүүлээ болсон энэхүү хамтлагийн гишүүд бүгд хайр дурлалынхаа эзнийг олсон бололтой.

“Охидын эрлэг” гэх этгээд хочтой дуучин Энхүүш хүртэл “Чи шүү” шоуныхаа оролцогч бүсгүйтэй үерхэх болсон байна. Хайр дурлалаа бататган хамтдаа амьдрах болсон тэднээр найзууд нь тун их бахархдаг бөгөөд “Ийм сайхан гэр бүлд одоо хүүхдийн инээд л дутагдаж байна. Хурдхан хүүхэдтэй болооч ээ” хэмээн шавдуулж байсан цаг саяхан. Тэгвэл хайртай эхнэр нь өдгөө таван сартай жирэмсэн төдийгүй дуучин залуу ч хамаг байдгаараа халамжлаад бөөн баяр яваа аж. Юутай ч, одоо "Охидын эрлэг" маань томоожиж аав болох бэлтгэлээ эртнээс базааж явна. Хамтлагийнхаа уран бүтээлээс гадна Энхүүш хувийн бизнесээ тун амжилттай удирдаж байгаа шаггүй овсгоотой нэгэн гэлцдэг юм билээ.

Р.Есүй