С.Энхболд: Нэн шаардлагатай үйлчилгээнд хязгаарлалт тавихгүй

Гемодиализийн тусламж үйлчилгээний гүйцэтгэл, санхүүжилтийн талаар ЭМДЕГ-ын дарга С.Энхболдоос тодрууллаа.

-Диализийн тусламж үйлчилгээний гүйцэтгэлийн санхүүжилт, зохицуулалт хэрхэн хэрэгжиж байна вэ?

-Диализ нь бөөрний архаг дутагдалтай иргэдэд зайлшгүй хэрэгтэй, тогтмол хийгддэг тусламж үйлчилгээ юм. Эрүүл мэндийн даатгалын сан ийм төрлийн тусламж үйлчилгээний чанар, хүртээмж, тасралтгүй байдлыг хангахад онцгойлон анхаарч, төлөвлөгөөт тусламжийн ангилалд оруулан жил бүрийн төсөвт тусгаж, санхүүжүүлдэг.

-Төсөв санхүүгийн хувьд сүүлийн жилүүдэд ямар өөрчлөлт гарсан бэ?

-Диализийн тусламж үйлчилгээнд зарцуулах төсөв жилээс жилд нэмэгдэж байна. Тухайлбал,
 

• 2022 онд 2135 иргэнд 195842 үйлчилгээг үзүүлж, 26.3 тэрбум төгрөг
• 2023 онд 2134 иргэнд 221276 тохиолдолд 31.4 тэрбум төгрөг
• 2024 онд 2499 иргэнд 250721 тохиолдолд 38.6 тэрбум төгрөг
• 2025 оны эхний дөрвөн сард 1941 иргэнд 58515 үйлчилгээнд 9.3 тэрбум төгрөг зарцуулаад байна. Эдгээр тоо нь өвчтний амь нас, амьдралын чанарт шууд хамааралтай нэн шаардлагатай тусламж үйлчилгээнд хязгаарлалт тавилгүй санхүүжилж байгааг илтгэнэ.

-Диализийн тусламж үйлчилгээг ямар эмнэлгүүд үзүүлж байна вэ?

-Өнгөрсөн оны байдлаар нийт санхүүжилтийн 63 хувь нь хувийн хэвшлийн эмнэлгүүдэд олгогдсон. Хүчин чадал, тоног төхөөрөмжийн хангалт, ээлжийн зохицуулалтад анхаарснаар иргэд тасралтгүй тусламж үйлчилгээг авч чаддаг болсон.

-Энэ онд тусламж үйлчилгээ худалдан авах гэрээнд ямар шинэ зохицуулалт орсон бэ?

-Гэрээний нөхцөлд бууралт оруулаагүй. Харин шинээр диализд орох иргэдийн санхүүжилтийг шуурхай шийдвэрлэх уян хатан зохицуулалт нэмэгдсэн.

-Зарим иргэн эмчилгээ тасалдаж байгаа талаараа нийгмийн сүлжээнд мэдээлсэн. Энэ талаар ямар арга хэмжээ авч байна вэ?

-Даатгалын сангийн гол зорилго бол нэг ч иргэний эмчилгээг тасалдуулахгүй байх юм. Гүйцэтгэлд тулгуурласан төлөвлөлт, нэмэлт санхүүжилтийн уян хатан зохицуулалт бий. Эрүүл мэндийн даатгалын зорилго бол иргэн даатгуулагчийг санхүүгийн эрсдлээс хамгаалах бөгөөд нэн шаардлагатай тусламж үйлчилгээнд хязгаарлалт тавихгүй байх зарчим баримталж байна.