Цэцэрлэгийн бүртгэлийн явцад эцэг эхчүүдээс хандив авахыг хориглолоо

Цэцэрлэгийн бүртгэл энэ сарын 25-28-ны хооронд 08.30-17.30 цагийн хооронд болно. Бүртгэлийг эмх, цэгцтэй явуулахыг Нийслэлийн боловсролын газраас дүүргүүдийн боловсролын газарт даалгасан бөгөөд цэцэрлэгүүд бүртгэлтэй холбоотой мэдээллийг эцэг, эхчүүдэд нээлттэй хүргэх ёстой.

Мөн цэцэрлэгийн бүртгэлийн явцад эцэг, эхчүүдээс ямар нэгэн төлбөр, хураамж авах ёсгүй бөгөөд цэцэрлэгийн эрхлэгч, багш нарыг зөвхөн хамран сургах тойргийн хүүхдүүдийг бүртгэж авахыг сануулж байна.

Хэрвээ цэцэрлэгийн бүртгэл, авлига, хээл хахуультай холбоотой баримттай гомдол байвал 11-11 төв болон харьяа дүүргийн боловсролын газар, Нийслэлийн боловсролын газарт хандах боломжтой аж.